Кыргыздар кылымдар бою ичип келген кымыз көптөгөн оорулардын алдын алуучу жана айыктыруучу дарылык касиетке ээ экенин жөнөкөй эл гана эмес, эмчилер да баса белгилеп келишет. Алардын айтуусу боюнча, кымызды кургак учук, гастрит, панкреатит, аз кандуулук, неврастения, жүрөк жана кан тамыр ооруларын айыктырууда колдонууга болот.
Бүгүнкү күндө жайкысын өлкөбүздүн кээ бир аймактарында эс алуу менен бирге кымыз ичип ден соолугун чыңдагысы келгендер үчүн эс алуунун бардык мүмкүнчүлүктөрүн камтыган атайы борборлор иштейт. Ал эми жөн гана кымыз ичүүнү каалагандар, жайлоого чыгып, чабандар ижарага берген боз үйлөрдө түнөп эс алуу менен убакыт өткөрө алышат.
