Негизги маалыматтарга караганда 90000ге жакын петроглиф камтыган Саймалуу Таш аймагы Борбор Азиядагы эң ири петроглиф үймөгү болуп эсептелет. Ташка чегилген сүрөттөрдүн эң эскилери б.к.ч. III миң жылдыкка (энеолит жана бронз эпохалары) таандык. Сүрөттөр Орто Азиядагы байыркы аңчы, мал чарбачы жана эң биринчи дыйкандардын күнүмдүк жашоосу, дүйнөгө болгон көз карашы, тарыхы жана маданияты тууралуу маалыматтын баа жеткис булагы болуп эсептелет. Аймак ЮНЕСКОнун дүйнөлүк маданий мурастарынын алдын-ала тизмесине киргизилген.